اتمنى  ان  تصل رسالتى الى  كل مسئولى وزارة  التربية والتعليم  وان يتقبلوها  بصدر  رحب  ويناقشوا عناصرها   فى شكل  استفتاء     مع كل  الاطراف ..
 بداية اقول :  
 السلام عليكم ورحمه الله وبركاته ..  هذه  استغاثه من ام مصريه وامهات كتيرة  مثلى ..  ارجو من الوزارة تسمع وجهة نظرنا  وتحاول  تبحث  عن حل مناسب لمشاكلنا مع  تعليم  ولادنا ..
  اولادنا في الابتدائي .. بدأنا معهم العام الدراسى بكل حماس ونشاط ..  ولكن بعد دخولهم  المدارس بيومين بالضبط ..  قالوا لنا في تقييم ..   إلا هو ازاى ؟ وامتي؟  الاولاد لسه داخلين من يومين؟ 
قالوا لنا  دي قرارات ولازم تتنفذ وضغطنا على اولادنا وعلي نفسنا ودخلناهم  تقيىمات واحنا لسه داخلين من يومين !!

 طبعا كالعاده اسبوع وراء اسبوع والتقييمات شغاله تمام مفيش راحه خالص الاطفال تصحي الساعة 6 صباحا وترجع من المدرسه الساعة 2 ونص ظهرا  علشان نبدأ   نذاكر  !!
 هو ده المفروض ..  لكن المفاجأة عبء علي الاولاد اللى مطلوب منهم   اتنين كشكول  لكل ماده .. كل كشكول 100 ورقه ..   ليه  مش المفروض فيه  كتاب تقييمات .. 
 لا دي اومر  أن الاولاد يكون في اتنين كشكول !!
..  طب ما المفروض كتاب التقييمات معمول  عشان الاولاد يحلوا فيها .. مفيش فايده !!

 حاضر .. نجيب كشاكيل لكل ماده !!
 طيب وبعدين ؟! 
 لو حضرتك غيرت منهج العربي والدين والانجليزي ..  مفيش مشكلة لكن ليه  تحط منهج  رياضيات  معقد للغايه لايتناسب مع اطفال  الابتدائي ..   مين قال إن تالته ابتدائي لازم يعرفوا الالواف ومعها  حفظ جدول ضرب كله والقسمة والساعة  ..   كل ده  في التيرم الاول !!
 كدة  حضرتك الاطفال الا كانت بتحب الرياضيات للاسف كرهوها  ..  لان المهنج تقيل جدا ..  مطلوب منهم كل ده  يخلص في تيرم واحد  وحفظ جدول ضرب في يومين علشان التقييمات الاسبوعيه وامتحان شهر أكتوبر ..   ده  يرضى مين ؟!
 نيجي بقي للعربى .. المهنج حلو جدا ..لكن  النقطة  الصعبة  ..   نص الاستماع !!
 الاطفال  اول مرة يأخدوا نصوص  الاستماع ..  مفيش مشكلة لكن  مين اللى قال  انه  يتقال للاولاد مرة واحدة  دون اعادة  كما جاء في امتحان  أكتوبر ؟!
 هم لسه اول مرة يأخدوا نص الاستماع ..
الأهم بقي مفروض حضرتك قلت ان فيه  كتاب تقييمات .. المفاجأة في العربي هناك نص متحرر صعب كمان علي اطفال تالته ابتدائي ده  يرضى مين ؟!!
 المفروض حضرتك ممنوع الخروج عما يتضمنه كتاب التقييمات ولكن  المفاجأة كانت في امتحان الشهر  مفيش رحمة ..  عاوز تعمل تقييمات احنا معاك ومش ضدها .. لكن مش بهذه الطريقة.. 
 حضرتك ممكن ترجع زى زمان لما  كان  فيه امتحان كل شهر  نعرف من خلاله  مستوي الاولاد .. احنا موافقين لكن حضرتك لاتضعنا  تحت  ضغط طول اسبوع تقييمات وبعدها امتحان شهر ..  دول اطفال !! للاسف ..  انا ابني قالى ..   انا كرهت المدرسة  .. نفسي انام  !!
   الاطفال اتحرموا  من التدريب والنوادي بسب الضغط اللى  عليهم  اسبوعيا ..  أصبحت حياتهم  تقييمات اسبوعيه  ..  كشاكيل لازم  تكون فيها الواجبات ..  والا مفيش اعمال سنة مع الحرمان من الدرجات !!  نفسنا حضرتك تعيد النظر وتنظر لاطفال ابتدائى  بعين الرحمة ..  لانهم  تحت ضغط جامد حتى الانشطة المدرسية  من كرة و موسيقي وغيرهما   للاسف مبقتش موجودة في المدرسه  .. لان  مفيش وقت لممارستها  رغم أهميتها   فى تكوين شخصية الاطفال في هذا السن .. للاسف اتحرموا من كل حاجة  بسب التقييمات الاسبوعيه والصحيان 6 صباحا و النوم  12 ليلا ..
 حضرتك وصلت الولد يقولي انا نفسى اكون مدير  ..  اقوله ليه يا ابني ..   علشان يكون في انشطة  8 ساعات وساعتين بس دراسه حضرتك متخيل طفل ابتدائي وصل تفكيره لحد فين  ؟!!
ياريت تنظر للاولاد بعين الرحمة .. وتحاول تراجع  المناهج المعقدة خصوصا الرياضيات و كونكت بلس اللى حضرتك وعدته بتغييره ولكن للاسف لم يحدث ذلك  ..  واستمر الوضع منهج  تقيل جدا علي اطفال مدارس تجريبي ..
 احنا مع حضرتك ..   بس احنا كأمهات نطلب منك  تنظر للاطفال  بعين الرحمة ..   نفسنا نرجع اولادنا التمرين في النوادي و يكون فيه  وقت للاسترخاء علشان يرجعوا يحبوا المذاكرة والمدرسة والدراسه.