قالت ميريهان، ابنة الفنانة الراحلة مديحة كامل، إن إصابة جدتها بجلطة فى المخ كانت من أبرز الأسباب التى دفعت والدتها إلى إعادة النظر فى حياتها، قبل أن تترك الفن وتتجه إلى التقرب من الله ودراسة الدين.

وقالت ميريهان، خلال استضافتها فى برنامج «الستات» المذاع عبر شاشة النهار مع الإعلامية سهير جودة، إن مديحة كامل تأثرت بشدة بما مرت به والدتها، موضحة: «جدتى كانت أجمل من أمى بكتير جدا جدا، وفى وقت جالها جلطة فى المخ ووالدتى وقتها سابت كل حاجة وفضلت جنبها... وخلال أيام القمر دى اتحولت وشعرها أبيض وجسمها خس جدا، وده خلى مديحة كامل تحس إن مفيش حاجة بتدوم ولا جمال ولا أى شيء وسابت كل حاجة وتقربت من الله ودروس الدين».

وأضافت أن والدتها أصبحت شديدة القرب من الله، وكانت دائمة القراءة فى الفقة والشريعة والسنة والقرآن وتفسيره، كما كانت تستمع باستمرار إلى خواطر الشيخ الشعراوى، مشيرة إلى أن اهتمامها بالدين انعكس أيضا على حياتها الأسرية، وقالت: «مديحة كامل كانت بتضربنى علشان الصلاة وكانت بتدعيلى بالحجاب».

وفى سياق حديثها عن علاقتها بوالدتها، نفت ميريهان ما تردد عن وجود خلافات قوية بينهما، مؤكدة: «فى شائعات طلعت إنى بقول إن علاقتى بيها مكنتش أحسن حاجة... لكن الكلام ده مش حقيقى خالص وحسبى الله ونعم الوكيل أنا علاقتى بيها كانت قوية جدا وكويسة».

واستشهدت بمواقف من طفولتها لتأكيد قوة العلاقة بينهما، قائلة: «أمى عمرها ما قصرت معايا خالص بالعكس أوقات كتير كانت بتسيب التصوير علشان تجيلى المدرسة وكانت تاخدنى معاها الاستوديو عشان تذاكرلى بين المشاهد».
كما تحدثت عن علاقة مديحة كامل بأحفادها، مؤكدة أنها كانت جدة شديدة التعلق بهم، وقالت عن فترة ولادة ابنها يوسف: «فى بداية ولادتى ابنى يوسف كانت غيرانة إنى مهتمة بيه ومش مهتمة بيها... لكن أول ما تم 3 شهور مبقتش تسبهولي».